الجزء التانى الى من يشتكى ذنوبه حلول عمليه ادخلو بسررررررررررررعة

الحلقة الخامسة
"كل شيء.. راح"

مر أسبوع كامل على أحمد لم يتواصل فيه مع خالد.. رغم اتصال أحمد مرتين به وعدم رد خالد المستمر..
فظن أن لديه عذرا ما وقرر الانتظار حتى تتضح الأمور أكثر..

وذات يوم بينما يفتح أحمد الماسنجر الخاص به إذا بخالد متصل باسم "كل شيء راح"
قلق أحمد من الاسم وبدأ معه محادثة نصية

Nudge !
رب اغفر لي: السلام عليكم ورحمة الله وبركاته
خالد أنت هنا ؟
.
.
.رب اغفر لي: خالد ؟؟
بجد لو موجود رد عليا أنا قلقت عليك بجد..

كل شيء راح: وعليكم السلام ورحمة الله وبركاته
رب اغفر لي: فيه إيه يا خالد مالك.. شكلك مش طبيعي !
كل شيء راح: مفيش يا أحمد الحمد لله
عامل إيه أنت
رب اغفر لي: خالد !
كل شيء راح: أحمد بالله عليك سيبني في حالي.. بجد يا أحمد أنا تعبان شوية معلش
رب اغفر لي:
خالد أنا بجد مش عايز أتقل عليك.. بس مقدرش أسيبك كده
كل شيء راح: معلش
رب اغفر لي: لا حول ولا قوة إلا بالله
.
.
كل شيء راح: أنت مش شايف اسمي ؟
رب اغفر لي: شايف والله يا خالد
كل شيء راح: أمال عايز تعرف إيه تاني.. هو ده كل الموضوع.. كل شيء راح..
رب اغفر لي: طب ينفع تحكيلي ولا فيه مانع ؟
كل شيء راح: مش عارف والله يا أحمد.. بس أنا تعبان
أنا تعبان أوي يا أحمد
آآآه يا أحمد
رب اغفر لي: أنا مش بأتطفل عليك صدقني أنا بس نفسي أساعدك
كل شيء راح: شكرا يا أحمد.. ما أظنش هتقدر..
رب اغفر لي:
طب فضفضلي وأنا مش هأتكلم ماشي ؟
.
.
.
ماشييييييي ؟؟؟؟؟
كل شيء راح: ماشي يا أحمد... ماشي...
.
.
أنا تعبان يا أحمد والله..
ياااااااه.. مش عارف نفسي في إيه..
لو كان الموت راحة كنت قلت لك نفسي أموت.. بس تبقى مصيبة لو مت.. وطلع الموت مش راحة يا أحمد ..

فاكر يا أحمد الحوار اللي كلمتني فيه كذا مرة ؟؟
موضوع القرف.. فتنة الـ.. النساء..

خلاص يا أحمد.. أنا اكتشفت أن الموضوع ده ملهوش حل..

يبدو أن أنا ضعت خلاص.. ننسى بقى موضوع ملتزم وشيخ والكلام ده.. كله كلام والله.. ماحدش عارف إيه اللي وراء المنظر اللي أنا فيه ده..

أحمد أنا حاسس أني حيوان.. عارف بجد.. بأحس أني كلب مثلا أو حاجة كده..
بأحس أني مش إنسان مسلم.. بأحس أني عار أصلا على الإسلام..

تعرف؟؟.. والله مش عارف.. بس أنا حاسس بكده..

كأن ده مصيري وخلاص.. ولازم أستسلم للأمر الواقع..

بعد كده ماتقوليش يا خالد.. قل لي يا كلب.. قل لي يا مفتون.. قل لي أي حاجة زفت..

رب اغفر لي:

كل شيء راح: عارف أني كأبتك يا أحمد.. قلتلك من الأول سيبني في حالي مرضيتش..
رب اغفر لي: خالد بالله عليك اسكت.. كمل كلامك .. أنا مركز معاك والله

كل شيء راح: خلاص أنا معنديش كلام تاني عايز أقوله..
هي دي الخلاصة.. كل شيء.. انتهى..

رب اغفر لي: مش احنا يا خالد قلنا هنتكلم مع بعض في الحوارات دي وهنساعد بعضنا إن شاء الله؟
كل شيء راح: كله كلام يا أحمد..
رب اغفر لي: إزاي بس يا خالد
كل شيء راح: بصراحة وماتزعلش مني، هي دي الحقيقة.. شوف يا أحمد أنت كلمتني قد إيه وكام مرة.. وشريط وبتاع.. ربنا يكرمك.. بس إيه النتيجة ؟؟
رب اغفر لي: أنت سمعت الشريط ؟
كل شيء راح: آه والله
رب اغفر لي: طيب يا خالد يعني أنت ماشي في الطريق أهو.. أمال ليه نفسيتك في الأرض كده.. أنت.... ؟؟
كل شيء راح: ..
رب اغفر لي: أنت وقعت تاني يعني ؟؟
كل شيء راح: أيوة يا أحمد وقعت.. اتنيلت...سيبني بقى عشان أنا مش ناقص وأنا والله مكسوف منك بشكل معفن أصلا..
رب اغفر لي: يا سبحان الله.. احنا مش قلنا ننفض لموضوع الكسوف ده وتعتبرني زي دكتور ؟
آ.. آسف والله يا خالد.. مش قصدي دكتور.. قصدي نبقى صرحاء مع بعض عشان نعرف نساعد بعضنا بإذن الله ؟؟ ووعدتك أنك مش هتنزل من نظري ولا الكلام الفاضي ده ؟؟

كل شيء راح: ماشي يا أحمد.. شكرا
رب اغفر لي: قل لي بقى.. أنت كل اللي فيه ده عشان خاطر وقعت في الذنب يعني ؟؟
كل شيء راح: أحمد أنت مش عارف.. ربنا يثبتك يا رب بس بجد دي حاجة وحشة أوي.. عارف لما تعمل المعصية.. والله بييجي لك غم وهم وقرف ينكد عليك حياتك كلها..
وبعدين كل ده يأثر على مذاكرتي ويأثر على علاقتي مع أهلي ويأثر على كل حاجة..
كله بسبب المعصية
رب اغفر لي: معاك حق والله
كل شيء راح: ربنا يعفو عني
رب اغفر لي: آمييييين يا رب وإيانا..

بس أنت ملكش حق في اللي بتعمله ده
كل شيء راح: ؟؟
رب اغفر لي: مش بأهوّن من مشكلتك والله.. بس يا خالد أنت عملت إيه يعني ؟؟ قتلت ؟؟ سرقت ؟؟؟ زنيت ؟؟؟ يا أخي احمد ربنا أنك لسه بتصلي وأنك بفضل الله لسه على التوحيد
كل شيء راح: كلامك عجيب يا أحمد !! ما هو ده اللي ناقص اللي أنت بتقوله ده !!!!
رب اغفر لي: أنت فهمتني غلط.. أنا مش قصدي أنك عملت ذنب بسيط.. لأ طبعا... ومش بأقولك احكيلي عملت إيه بالتفصيل.. أنا فاهمك صدقني..
لكن أنا قصدي إذا كان ربنا سبحانه وتعالى يقبل التوبة من اللي بيقتل ويسرق ويزني.. يبقى مش هيقبل التوبة منك يا خالد ؟؟
كل شيء راح: يا أحمد ماشي حتى لو تبت.. ما أنا بأرجع تاني يوم إيه اللازمة يعني !
رب اغفر لي: إزاي بقى يا خالد !.. تأكد أنك طول ما أنت بتجاهد نفسك ربنا مش هيخذلك.. أبدا
كل شيء راح: أحمد كلمني بمنطقية.. كلمني على قد عقلي يا عم... إيه لازمة إني أجاهد مليون يوم وبعد كده اقع في الآخر.. إيه اللازمة بقى ؟؟!
رب اغفر لي: خالد.. هدي نفسك عشان نعرف نتفاهم.. ربنا سبحانه وتعالي يقول ((والذين جاهدوا فينا لنهدينهم سبلنا)).. وأنت تقول لي إيه اللازمة !
وبعدين من قالك أن ربنا يريد منك النتيجة ؟؟ أنت دايما ناسي أن ربنا سبحانه هو الخبيييييير يا خالد.. هو العليم.. هو اللي خلقك وعارفك وعارف تركيبك وأسلوبك وكل حاجة فيك ؟؟
ربنا سبحانه أمرنا أننا نجاهد.. وأننا نسعى (وأن ليس للإنسان إلا ما سعى).. وأننا نبدأ وأننا نحاول وأننا ننوي وأننا ناخد بالأسباب وأننا نتوكل عليه وأننا نعمل كل حاجة نقدر نعملها.. لكن طالما أنت في الطريق يبقى ماينفعش تيأس !

كل شيء راح: يعني أنت عايز تقول أني طالما بأحاول واجاهد، إني لو وقعت في الذنب مش عليا وزر ؟؟
رب اغفر لي: أنا مقلتش كده يا عم.. هتوديني في داهية .. أنا قلت طالما بتجاهد يبقى ما تياسش.. لأن اليأس أصلا هيرجعك لورا.. والشيطان هيقولك أديك حاولت ستين مرة وكل مرة تقع، مفيش منك فايدة.. استفدنا إيه بقى من اليأس ؟؟ قتل همتك وعزيمتك وبوظلك كل حياتك...
وعلى فكرة فيه فرق بين الندم على المعصية اللي هو شرط من شروط التوبة، وبين اليأس اللي أنت فيه دلوقتي.. عشان ماتقوليش مش عايزك تتوب

كل شيء راح: طب اعمل إيه يا أحمد بس.. كتر المحاولات واستمرار الفشل بيخليني فعلا أيأس..
أنا بشر برضه وعندي مشاعر

رب اغفر لي: ماحدش بيقولك تخلى عن بشريتك.. لكن هي دي سنة الله في الكون.. زي ما احنا بشر وعندنا أحاسيس، ربنا خلقنا بشر مش معصومين.. وجعل الشيطان والنفس والهوى ضدنا.. وأمرنا بالجهاد والصبر على المعاصي.. وجعل ثواب اللي يصبر في الدنيا أنه ينعم في الجنة.. ولا أنت عايز الجنة ببلاش

كل شي راح :
رب اغفر لي: خالد معقولة أنا اللي هأفكرك ؟؟ نسيت قول الله عز وجل "قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم"

نسيت قول رسول الله صلى الله عليه وسلم: (ما من عبد مؤمن إلا و له ذنب ، يعتاده الفينة بعد الفينة ، أو ذنب هو مقيم عليه لا يفارقه ، حتى يفارق الدنيا ، إن المؤمن خلق مفتنا ، توابا ، نسيا ، إذا ذُكِّرَ ذَكَر) والحديث صححه الألباني
ليك ذنب يا خالد.. ومفتن ونسيّ.. لكن تواب.. وإذا ذُكّرت ذكرت..

كل شيء راح: يا رب اغفر لي
رب اغفر لي: ده المؤمن يا خالد مش المسلم كمان !.. يا سبحان الله..

وشوف قول رسول الله صلى الله عليه وسلم في الحديث.. استنى أدور لك عليه..
.
.
.
قال رسول الله صلى الله عليه وسلم: (إن عبدا أصاب ذنبا ، وربما قال : أذنب ذنبا ، فقال : رب أذنبت ، وربما قال : أصبت ، فاغفر لي ، فقال ربه : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ثم أصاب ذنبا ، أو أذنب ذنبا ، فقال : رب أذنبت - أو أصبت - آخر فاغفره ؟ فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ، ثم أذنب ذنبا ، وربما قال : أصاب ذنبا ، قال : قال : رب أصبت - أو قال : أذنبت - آخر فاغفره لي ، فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثلاثا ، فليعمل ما شاء) رواه البخاري

كل شيء راح: رب أذنبت فاغفر لي
رب اغفر لي: ولا حديث قاتل المائة نفس.. ولا الحديث القدسي "قال الله تعالى : يا ابن آدم إنك ما دعوتني و رجوتني غفرت لك على ما كان فيك و لا أبالي ، يا ابن آدم لو بلغت ذنوبك عنان السماء ثم استغفرتني غفرت لك و لا أبالي ، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة" والحديث حسن يا خالد
.
.

رب اغفر لي: عارف يا خالد... تعرف أن الياس والقنوط من رحمة الله دي من أعظم الذنوب عند ربنا ؟
كل شيء راح: بجد ؟
رب اغفر لي: آه بجد.. الشيخ هاني حلمي كان قال كده في شريط نفسي أتوب.. شريط حلو ابقى اسمعه
كل شيء راح: تاني
رب اغفر لي: يا سلااااااام.. إيه الجمال ده يا خواتي.. أبو الهول نطق
كل شيء راح: يا معفن
رب اغفر لي: ههههههههه... ممكن بقى تغير اسمك ده لأنه يجيب اكتئاب لوحده أصلا...
كل شيء راح: طب استنى
.
.
.
رحماك: إيه رأيك كده ؟
رب اغفر لي: يا سلااااااااااام.. فرق كبير جدا...
رحماك: بس أنا كنت فيه كذا نقطة عايز أسألك فيها..
رب اغفر لي: كل نقطة بخمسين قرش
رحماك: هههههه.. ماشي

بص يا سيدي..

الحلقة السادسة
هل أنا مُصر؟

بص يا سيدي..
أنا كان فيه كذا سؤال بيدور في ذهني بخصوص موضوع التوبة ده..
أنا عارف أن ربنا سبحانه وتعالى غفور رحيم.. وأنه يقبل توبة العبد ما لم يغرغر.. وأحاديث كتيرة جميلة عن التوبة.. لكن زي ما قلتلك كتر الوقوع بيولد إحباط..
فكنت عايز أسألك في كام نقطة، بس معلش تصبر عليا

رب اغفر لي: اتفضل يا عم.. كلي ودان صاغية

رحماك: ماشي.. أول حاجة، المقولة تقول لا صغيرة مع الإصرار ولا كبيرة مع الاستغفار.. طيب معنى كده أن أنا لما أنظر نظرة حرام أو أعمل أي ذنب عامة، بعدين أتوب منه، بعدين ارجع أقع فيه تاني.. يبقى كده وقعت في كبيرة ؟

رب اغفر لي: كبيرة؟ .. إزاي ؟
رحماك: عشان مصر عليها يعني..
رب اغفر لي: لا يا عم الموضوع مش كده.. أنت لما بتعمل الذنب.. هل بتتوب منه بجد ؟
رحماك: أيوة
رب اغفر لي: يعني بتكون ناوي فعلا على عدم العودة، ولا بتبقى نص نص؟
رحماك: لأ بأكون ناوي بجد.. بس بعدين بأضعف وبأقع تاني
رب اغفر لي: ماشي، بس المهم بتكون ناوي على عدم العودة، وبتحقق شروط التوبة الثلاثة (الندم، الإقلاع عن الذنب، العزم على عدم العودة)..يبقى أنت تبت بفضل الله.. لو ضعفت ووقعت تاني بقى ده مش إصرار..

رحماك: إزاي ما أنا وقعت في نفس الذنب؟
رب اغفر لي: لأ صدقني.. استنى أنا كان فيه فتوى تقريبا قريتها ليها علاقة بالموضوع ده.. ثانية كده معلش
رحماك: طيب بس بسرعة لحسن العصر قرب وأنا عندي أسئلة تاني
رب اغفر لي: ثواااااااااان
.
.
.
رحماك: أحمد ؟؟
Nudge

رب اغفر لي: أنا جيت
رحماك: أخيرا.. كنت بتجيب الفتوى من مدغشقر
رب اغفر لي: ههههههههه
معلش..

أهو بص يا سيدي.. ""ويعتبر العبد مصرا إذا لم يقلع عن المعصية ولم يتب منها ويندم على فعلها، أما من أقلع عن المعصية وتاب منها وندم على فعله لكنه عاد إليها بعد ذلك لضعفه البشري فإن هذا لا يعتبر مصرا، فإن تاب تاب الله عليه، وقد قال النبي صلى الله عليه وسلم: ما أصر من استغفر وإن عاد في اليوم سبعين مرة. رواه أبو داود والترمذي وغيرهما وحسنه بعض أهل العلم وضعفه بعضهم.""
الكلام ده من فتوى من الشبكة الإسلامية.. ودي وصلتها لو عايز
http://www.islamweb.net/ver2/Fatwa/ShowFat...;Option=FatwaId

رحماك: ما شاء الله لا قوة إلا بالله.. ده كلام جميل أوي
الشبكة الإسلامية دي إيه نظامها يا عم

رب اغفر لي: إيه نظامها إزاي يعني ؟
رحماك: مش متساهلة يعني ولا حاجة
رب اغفر لي: هههه.. لا متخافش ثقة إن شاء الله.. أنا الحمد لله بأعتبر الشبكة الإسلامية مرجعي الأول للفتاوى على الانترنت، وكمان ساعات أدور في إسلام واي وفي الإسلام سؤال وجواب بتاع الشيخ المنجد..

المهم..
كلامهم في الفتوى بيقول إن التوبة ثم الذنب ثم التوبة وهكذا، لا يعتبر إصرارا.. على فكرة مقولة "لا صغيرة مع الإصرار ولا كبيرة مع الاستغفار" قالها سيدنا ابن عباس رضي الله عنه..
رحماك: الحمد لله رب العالمين.. ربنا يكرمك يا حمادة..
بالنسبة لتاني سؤال..

رب اغفر لي: استنى.. بص برضه على الفتوى دي لقيتها وأنا بأدورلك على الأولى.. برضه أخ بيسأل هل تكرار الذنب والتوبة يعتبر إصرار ولا لأ.. والجواب فيه كلام كثير جميل ومفيد..
http://www.islamweb.net/ver2/Fatwa/ShowFat...;Option=FatwaId

رحماك: طب هأشوفها بعدين.. بالنسبة للسؤال التاني
رب اغفر لي: خالد.. ما تضيعش الموضوع .. روح اقرأ الفتوى وأنا مستنيك
رحماك: طيب يا رخم
.
.
.
رحماك: الحمد لله رب العالمين.. قريتها.. جزاكم الله خيرا يا شيخ
رب اغفر لي: جزانا وإياكم وبطل تريقة
ها كنت عايز إيه كمان

رحماك: كنت بأقولك يا سيدي.. دلوقتي احنا عرفنا أن بفضل الله تكرار الذنب مع التوبة مش إصرار.. جميل..
لكن سؤالي، موضوع تكرار الذنب ده مش يعتبر عدم صدق مع ربنا في التوبة ؟

رب اغفر لي: يا بني ما أنا قلتلك.. لو الواحد بيتوب كده أي كلام وهو عارف أنه هيعمل الذنب تاني يبقى طبعا غلط.. لكن لو بيتوب بجد وبينوي فعلا أنه ما يرجعش لكن تغلبه نفسه الأمارة بالسوء ويضعف وكده.. فسبحان الله كلنا بشر بنخطئ..

رحماك: ماشي بس برضه
رب اغفر لي: أنت مش هتستريح غير لما أجيبلك كلام منقول، صح ؟
رحماك: بصراحة آه .. معلش والله يا أحمد
رب اغفر لي: بس يلا.. استنى بقى شوية..
.
.
.
رب اغفر لي: امسك يا تاعبني..
إنسان أذنب ثم تاب ثم كرر نفس الذنب و تاب وهكذا بحيث أنه يكرر الذنب مع أنه يريد الإقلاع عنه فهل تقبل توبته وماذا يفعل حتى يبقى على هذه التوبة دون الرجوع لهذا الذنب؟
والجواب هنا (ماتخافش قصير مش زي اللي فاتت)
http://www.islamweb.net/ver2/Fatwa/ShowFat...g=A&Id=1909

رحماك: شكراااااااااااااااااا جزيلاااااااااا..
معلش والله ماتزعلش.. بس أنا فعلا محتاج للفتاوى دي يا أحمد..
إن شاء الله في ميزان حسناتك يا عم..

رب اغفر لي: يا رب يا خويا..

رحماك: طيب هو فاضل كمان سؤال بصراحة..
رب اغفر لي: قول يا عم

الله أكبر الله أكبر

رحماك:
رب اغفر لي: العصر أذن
تلحق تقول بسرعة ؟

رحماك: لا ياعم أنا عايزك تركز.. طب بص..
مش عارف

بص أنا هأقولك موضوع السؤالوتبقى تدور على الرد بتاعه وتقوله لي بعدين إن شاء الله.. ماشي؟
رب اغفر لي: ماشي إن شاء الله
رحماك: السؤال هو عن الحديث اللي بيقول "إذا خلوا بمحارم الله انتهكوها".. عارفه؟ اللي هو ناس بتيجي بأعمال عظيمة زي جبل تهامة..

رب اغفر لي: أيوة أيوة عارفه.. إيه السؤال؟
رحماك: كنت عايز أعرف لأني سمعت الحديث ده من زمان ومن ساعتها متحير.. هل المقصودين بالحديث ده هم اللي بيقعوا في الذنوب لما يبقوا لوحدهم، ولا الحديث يقصد أنه بيمثل قدام الناس أنه ملتزم لكن لوحده بيظهر على حقيقته ؟

يعني هل لو واحد فعلا بيحاول يلتزم ويصلي ويصوم ويتصدق وو.. بس ساعات يضعف لوحده لما يكون في خلوة.. يبقى بينطبق عليه الحديث ده، ولا إيه..

رب اغفر لي: آه فهمتك..
رحماك: أصل لو كده تبقى كارثة يا أحمد

رب اغفر لي: طيب أنا معرفش، بس هأدورلك إن شاء الله وأقولك في أقرب فرصة بإذن الله..
رحماك: ربنا يعزك يا رب.. معلش أنا طولت عليك اوي يا أحمد
رب اغفر لي: أنت هتصلي فين ؟
رحماك: هاصلي في المسجد اللي جنبنا إن شاء الله..
رب اغفر لي: مش هأشوفك في الصلاة يعني؟
رحماك: لا يا عم ربنا يعزك.. أنتم المسجد اللي عندكم بيطول أوي
رب اغفر لي: هههه.. طيب يا خويا..
أي خدمة ؟
رحماك: تشكرررررررر
رب اغفر لي: ادعيلي بقى لحسن أنا حالي مش متظبط أوي..
رحماك: ربنا يكرمك ويعزك ويحفظك ويعينك وييسر لك أمرك ياااااااا رب
رب اغفر لي: آمين.. وبظهر الغيب بقى.. يللا.. السلام عليكم ورحمة الله وبركاته
رحماك: وعليكم السلام ورحمة الله وبركاته
سبحانك اللهم وبحمدك نشهد أن لا إله إلا أنت نستغفرك ونتوب إليك

جميلة جدااا بارك الله فيكي

» الى من يشتكى ذنوبه حلول عمليه ادخلو بسررررررررررررعة
» أمــــــى الجزء التانى
» يا سامعا لكل شكوى الجزء التانى
» امــــــــــى الجزء الاول
» حدث في محطة الرمل(الجزء الثاني)